SC/ST Act விதிகளின் படி, கடுமையான கொடுமைகள் அல்லது உயிரிழப்பு ஏற்பட்டால் அரசு நிவாரணத் தொகை வழங்க வேண்டும். ஆனால் நடைமுறையில் இந்த நிவாரணம் தாமதமாகவும், பல்வேறு ஆவணச் சிக்கல்களுடனும் வழங்கப்படும் நிலை தொடர்கிறது. பல குடும்பங்கள் இந்த நிவாரணத்தைப் பெற மாதக்கணக்கில் அலுவலகங்களுக்கு சென்று வர வேண்டிய கட்டாயத்தில் உள்ளனர். நிவாரணத் தொகை தாமதப்படுவதால் குடும்பத்தின் அன்றாட வாழ்க்கைச் செலவுகள் தாங்க முடியாத அளவிற்கு அதிகரிக்கின்றன; குழந்தைகளின் கல்வி பாதிக்கப்படுகிறது; வழக்கு தொடர்வதற்கான சட்டச் செலவுகள் கூடுதல் சுமையாக மாறுகின்றன.

இந்த பிரச்சினைகளைத் தடுக்க, “மரணம் ஏற்பட்ட உடனே — அதிகபட்சம் 7 நாட்களுக்குள் நிவாரணத் தொகை வழங்குதல்” என்ற கட்டாய நடைமுறையை சட்டத்தில் தெளிவாக சேர்க்கவது அவசியம். நிவாரணம் எந்தவித கோரிக்கையுமின்றி, தானாகவே பாதிக்கப்பட்ட குடும்பத்தின் வங்கி கணக்கில் சேர வேண்டும். அலுவலகங்களின் கடிதம், ரிப்போர்ட், விசாரணை தாமதம் போன்ற காரணங்களால் நிவாரணத்தைத் தள்ளிப்போடுவதை முற்றிலும் தடை செய்ய வேண்டும். இதை மீறும் அதிகாரிகளுக்கு கடுமையான தண்டனை விதிக்க வேண்டும். மேலும், இத்தகைய வழக்குகளுக்காக தனிப்பட்ட சிறப்பு நீதிமன்றங்கள் அமைக்கப்பட்டு, விரைவான தீர்ப்பு மற்றும் உடனடி நிவாரண செயல்பாடு உறுதி செய்யப்பட வேண்டும். 

பாதிக்கப்பட்டவரின் குடும்பம் அச்சுறுத்தலுக்கு உள்ளாகும் மிகப்பெரிய சாத்தியம் உள்ளது. வன்முறை சம்பவம் நடந்த இடங்களில் வழக்கு தொடருபவர்களையே குறிவைத்து தாக்குதல் நடத்தப்படும் சம்பவங்கள் அதிகம். அவர்களுக்கு வலுவான பாதுகாப்பு வழங்க வேண்டும்.